پڑھیے صلِ علیٰ پڑھیے صلِ علیٰ جانِ رحمت حبیبِ خدا آ گئے

پڑھیے صلِ علیٰ پڑھیے صلِ علیٰ جانِ رحمت حبیبِ خدا آ گئے

جن کے آنے کی دی ہر نبی نے خبر آج وہ شاہِ ہر دوسرا آ گئے

تیرگی چھٹ گئی روشنی ہوگئی کفر و ظلمت کا پھر خاتمہ ہوگیا

ذرہ ذرہ زمیں کا چمکنے لگا آپ جب بن کے بدرالدجیٰ آ گئے

جس طرف دیکھیے خیر کی بات ہے جس طرف دیکھیے خیر کا ذکر ہے

خیر و برکت سے ارض و سما بھر گئے اس کا مطلب ہے خیرالوریٰ آ گئے

بے نواؤں کی فریاد سن لی گئی ان کو تحفے میں رب نے یہ سوغات دی

بے نواؤں کے دن پھرنا طے ہوگیا بے نواؤں کے لو ہم نوا آ گئے

آفریں آفریں آفریں آفریں مرحبا مرحبا مرحبا مرحبا

چار جانب سے آتی تھی بس یہ صدا مصطفیی آ گئے مصطفیٰ آ گئے

کس طرف کھائی ہے کس طرف راستہ ہم کو اس بات کا کچھ نہیں تھا پتہ

راہ دینِ خدا تب دکھائی پڑی آپ جب بن کے نورالہدیٰ آ گئے

اس طرف اس طرف شور برپا ہوا مئے برسنے لگی دور چلنے لگا

جامِ توحید ہاتھوں میں اپنے لیے آ گئے ساقئ میکدہ آ گئے

دنیا جب راہِ حق سے بھٹکنے لگی ساری دنیا میں جب بڑھ گئی گمرہی

پھر خدا کا ثمرؔ یہ کرشمہ ہوا بن کے وہ خلق کے رہنما آ گئے