مرے احساس پر چھانا علی کا

مرے احساس پر چھانا علی کا

نتیجہ یہ ہوں دیوانہ علی کا

پیا ہے جب سے پیمانہ علی کا

نگاہوں میں ہے میخانہ علی کا

زمانے میں کوئی ان سا نہیں ہے

زمانہ یوں ہے دیوانہ علی کا

خدا کے گھر ولادت جانتے ہو ؟

ہے استقبال شاہانہ علی کا

وہ بے شک شمعِ بزمِ اؤلیا ہیں

ولی ہر اک ہے پروانہ علی کا

ہے غفلت کا نتیجہ شرم ساری

سبق دیتا ہے فرمانا علی کا

بنا دیتا ہے بزدل کو بہادر

ہے ایسا نام مردانہ علی کا

جہاں کہتا رہے اس کو دوانہ

ہے دانا جو ہے دیوانہ علی کا

چلی جا میرے سر سے اے مصیبت

نہ پھر میں لاؤں پروانہ علی کا

جو ہوگا شان سے جنت میں داخل

ثمرؔ وہ ہوگا مستانہ علی کا