اے امیر! اے شمع بزم ِاتقیا

اے امیر! اے شمع بزم ِاتقیا

خسروِ اقلیم اربابِ صفا!

شمع محفل بود محبوبِ خدا

تو نےشب جائے کہ من بودم کہا

نازشِ کونین کے اے رازداں

ہے رسائی تابہ اوجِ لامکاں

اے چراغِ دہلوی کے یار غار

صاحبِ جاہ و حشم ،شب زندہ دار

حبِ ابنائے وطن تیرا شعار

اور پھر ایجاد تیری ہے ستار

کائناتِ شوق دل کا ایک داغ

زندگی کا تو نے پایا ہے سراغ

کش کہ شہر سبز آبائی وطن

تیرا پٹیالی وطن، لعلِ ختن!

نو برس کی عمر میں فکر سخن

اور باندازِ وقوفِ روح و تن

تیرے موضوع ِسخن ذات و صفات

انفس و آفاق و امکان و ثبات

فنِ موسیقی میں یکتائے زماں

معرکوں میں بھی تھا میر کارواں

مؤمنِ کامل، بدامن دو جہاں

سرِ فی الآفات، ذوقِ کامراں

مطلع الانوار ہے تلقینِ حق

دفترِ معنی ہے جس کا ہر ورق

فضل سے پائی نگاہِ نکتہ رس

فکر فردا اور بہ ہوشِ پیش و پس

سارے اصناف سخن پر دسترس

جو کہا اللہ بس باقی ہوس

ذولسان و عکس و نغزو ریختی

کیف آور دو ہے، ٹھمری، مثنوی

عشق تیرا ذوالفقارِ بو تراب

بارگاہِ حسن میں تو بار یاب

فکر میں تیری حقیقت بے نقاب

جس سے سارا ایشیا ہے فیضیاب

دل ترا فانوسِ ایوانِ رسول

میرے گلہائے عقیدت ہوں قبول