محفلِ ہست و بود میں پرتو حسن ذات ہو

محفلِ ہست و بود میں پرتو حسن ذات ہو

روحِ یقین عشق ہو جلوہ گہِ صفات ہو

جلوہ فشاں ہو عرش سے تم ہی تو فرشِ خاک پر

تم ہو شعاعِ نورِ رب وجۂ تجلیات ہو

تم ہی ہو انبساطِ کل تم ہی ہو فضلِ بے حساب

کشمکشِ جہاں میں تم دافعِ مشکلات ہو

تم ہو سکونِ زندگی تم ہو وقارِ بندگی

کارگہِ حیات میں نازشِ التفات ہو

کر دی خدائے پاک نے تم پہ کرم کی انتہا

شاہدِ بزم کن فکاں رونق کائنات ہو

در پہ تمہارے ہر گھڑی ہے جو ہجومِ عاشقاں

تم ہو شفیعِ عاصیاں تم ہی رہِ نجات ہو