نہ میں مشتاق حوروں کا، نہ طالب قصرِ جنت کا

نہ میں مشتاق حوروں کا، نہ طالب قصرِ جنت کا

طلب گارِ کرم ہوں بس شہنشاہ رسالت کا

مجھے سرکار نے بخشی ہے جب سے لذت عرفاں

انہی سے ہر بھرم قائم مرے جذبوں کی وسعت کا

وہ بن کر رحمت للعالمیں آئے جو دنیا میں

تو پھر بجنے لگا ہر سمت ڈنکا حق کی وحدت کا

مچے گی ہر طرف صل علیٰ کی دھوم محشر میں

نظر آئے گا ان کے سر پہ سہرا جب شفاعت کا

تمہی تو ہو تسلی دلِ آزردگاں آقا

تمہی تو ہو سہارا ساکنانِ دشتِ غربت کا

تمہی نے توڑ ڈالیں جبر و محکومی کی زنجیریں

سبق تم نے دیا سب کو مساوات و اخوت کا

زبانِ شوق پہ صبح و مسا بس نام ہے اس کا

کرم ستارؔ مجھ پر ہے اسی جانِ محبت کا