یا رب ہو عطا الفتِ سلطانِ مدینہ

یا رب ہو عطا الفتِ سلطانِ مدینہ

آنکھوں میں رہے صورت سلطانِ مدینہ

بس جائیں مری آنکھوں میں طیبہ کے مناظر

دیکھوں میں یوں ہی طلعتِ سلطانِ مدینہ

ضو ریز وہاں رہتی ہے وحدت کی تجلی

ہے شہر نبی جنت سلطانِ مدینہ

وہ صبح ازل، شامِ ابد، جانِ دو عالم

ہے لطف خدا عظمتِ سلطانِ مدینہ

ہیں موج سخا، بحر کرم، مصدرِ رحمت

محبوبِ خدا حضرت سلطانِ مدینہ

اللہ سے ملتے ہیں وہ خود عرش بریں پر

دیکھے تو کوئی قربتِ سلطانِ مدینہ

ستارؔ یہ حسرت ہے دمِ نزع بھی دل میں

کرتا ہی رہوں مدحتِ سلطانِ مدینہ