وہ حق نماز ہے آئنۂ حسنِ ذات ہے

وہ حق نماز ہے آئنۂ حسنِ ذات ہے

روشن اسی کے جلوؤں سے یہ کائنات ہے

جنت کو سجے دیکھا تو حوروں نے یہ کہا

خالق کے گھر میں آج یہ کس کی برات ہے

اک رات جس میں طالب و مطلوب مل گئے

بے شک ہزارراتوں سے بہتر وہ رات ہے

مٹ جاؤ ان پہ عاصیو! تم سے جو ہو سکے

بس ان کے عشق ہی میں تمہاری نجات ہے

اس کو نہیں ہے گردشِ دوراں کا کوئی غم

جس پہ حضور کی نگہِ التفات ہے

ان کا ہی ذکر، ان کی مدح، ان کا تذکرہ

مجھے خستہ جاں کی یہ ہی متاعِ حیات ہے

ستارؔ مجھ پہ رشک ہے سارے جہان کو

میں ان کا ہو گیا ہوں بس اتنی سی بات ہے