صورتِ زیبا پیکر تاباں، حسن مکمل نورِ مجسم

صورتِ زیبا پیکر تاباں، حسن مکمل نورِ مجسم

مالکِ کوثر لطفِ فراداں، جانِ مسیحا عزت آدم

شانِ تکلم شرح قرآں، موجِ تبسم نور کا طوفاں

شمعِ شبستاں روئے درخشاں، عہدِ بہاراں بخشش پیہم

حسنِ خدائے پاک کا مظہر، سب سے برتر، سب سے بہتر

سارے جہاں سے ارفع و اعلیٰ سب سے مکرم سب سے معظم

جلوہ فزائے عالمِ امکاں، رازِ عروجِ ہستئی انساں

رحمتِ یزداں نازشِ دوراں، فخرِ رسولاں سید عالم

فیض و عطا سے کون مبرا، جود و سخا سے کون ہے خالی

کس پہ نہیں ہے آپ کا احساں، کس پہ نہیں ہے لطفِ پیہم

اوجِ رسائے فہم بھی آقا، آپ کی گردِ پا کو نہ پہنچی

آپ سراپا بحرِ کرم ہیں، میں ہوں فقط اک قطرۂ شبنم

اک مری یہ جانِ حزیں کیا، ماہ و انجم و نیر تاباں

غنچہ و گل سب گلشنِ ہستی آپ پہ قربان شاہِ دو عالم