ہر طرف آپ کا عکسِ رخِ زیبائی ہے

ہر طرف آپ کا عکسِ رخِ زیبائی ہے

آپ ہی سے مہ و انجم نے ضیا پائی ہے

آپ سے پہلے تھا ہر سمت خزاں کا عالم

آپ آئے تو گلستاں میں بہار آئی ہے

آپ کے حسن تبسم کی نمایاں ہے جھلک

مسکراتے ہوئے غنچوں میں جو رعنائی ہے

آپ کے نور سے پیدا ہوئے دونوں عالم

آپ کے جلووں کی سب انجمن آرائی ہے

آپ کی دید ہے دیدارِ خداوندِ کریم

آپ کے حسن میں اک شعلۂ یکتائی ہے

آہ و نالہ ہے، نہ فریاد و فغاں ہے آقا

آپ کی یاد ہے اور گوشۂ تنہائی ہے

مجھ سے بے علم کو بخشا جو یہ اندازِ سخن

اپنے ستارؔ کی کیا حوصلہ افزائی ہے