فخرِ حرم اے عزتِ آدم شاہِ رسولاں سیدِ ذیشاں

فخرِ حرم اے عزتِ آدم شاہِ رسولاں سیدِ ذیشاں

آپ پہ قرباں میرے دل وجاں ساقیٔ کوثر نازشِ خوباں

سرورِ عالم جانِ گلستاں مالکِ کل اے عظمتِ انساں

آپ کا غم ہر درد کا درماں آپ کا جلوہ جلوۂ یزداں

سجدہ کناں ہیں آپ کے در پر پیر و جواں سب سائل وسلطاں

آپ ہی کا تو نقشِ قدم ہے کعبۂ ایماں قبلۂ عرفاں

آپ سے روشن غارِ حرا ہے آپ کا مسکن عرشِ عُلا ہے

آپ حبیبِ داورِ محشر آپ ہیں سارے نبیوں کے سلطاں

نکہتِ گیسو رشکِ عنبر ان کا پسینہ مشک سے بہتر

صبحِ تجلی روئے منور جلوۂ ابرو عیدِ غریباں

لیجئے خبر اے شاہِ دو عالم دل ہے فسردہ آنکھ ہے پُرنم

چاک ہیں میرے جیب وگریباں میں ہوں اسیرِ گردشِ دوراں

چشمِ کرم اے رحمتِ عالم امتِ عاصی پر بھی خدارا

عقل ہے حیراں روح پریشاں کیجئے سب کی مشکلیں آساں