بہارِ صبحِ ازل ہے جمالِ روئے رسول

بہارِ صبحِ ازل ہے جمالِ روئے رسول

جسے بھی دیکھیے، ہے محوِ آرزوئے رسول

عروجِ فکر و نظر شرحِ گفتگوئے رسول

کمالِ لطف و عطا ہے کمالِ خوئے رسول

ہر ایک ذرۂ دل میں ہے ان کا عکسِ جمیل

نگاہِ شوق کو پھر بھی ہے آرزوئے رسول

ہے ان کا حسنِ تبسم چمن میں عطر فشاں

ہر ایک غنچہ و گل میں پسی ہے بوئے رسول

ملی ہے مجھ کو عجب لذت سجود و قیام

زہے نصیب کہ کعبہ ہے میرا کوئے رسول

مرے حضور سے میرا سلام کہہ دینا

نسیمِ صبح گزر ہو جو تیرا سوئے رسول

خدا مدینے میں ستارؔ مجھ کو پہنچا دے

تو نعتِ پاک پڑھوں جا کے رو بروئے رسول