خدا کے گھر سے طیبہ میں یہ کون عالی مقام آیا

خدا کے گھر سے طیبہ میں یہ کون عالی مقام آیا

کہ ہر سو شور ہے برپا وہ نبیوں کا امام آیا

مدینے میں وہ اس انداز سے مستِ خرام آیا

کہ اس کے پائے اقدس چومنے ہر خاص و عام آیا

زمانہ جگمگا اٹھا عجب اک روشنی پھیلی

نبوت کے ستاروں میں وہ جب ماہِ تمام آیا

کوئی کیا مرتبہ سمجھے گا اس کی ذاتِ اقدس کا

کہ عرشِ پاک سے اللہ کا جس پر سلام آیا

اسی کی جنبشِ ابرو سے ہر مشکل ہوئی آساں

حیاتِ عشق میں جب بھی کوئی نازک مقام آیا

جو دل اس کی محبت سے ہوا خالی تو پھر اس کے

عبادت کوئی کام آئی نہ کچھ تقویٰ ہی کام آیا

پئے تعظیم نظریں جھک گئیں صل علیٰ کہہ کر

زباں پہ جب کبھی ستارؔ میری ان کا نام آیا