گلستانِ محبت کی بہارِ جاوداں تم ہو

گلستانِ محبت کی بہارِ جاوداں تم ہو

سراپا رحمتِ پروردگارِ دو جہاں تم ہو

حسینوں میں حسیں ایسے کہ نازِ مہ و شاں تم ہو

رسولوں میں حبیبِ خالقِ کون و مکاں تم ہو

خدا شاہد تمہیں تو ہو سبب تخلیقِ عالم کا

کہ اے سلطانِ خوباں راز دارِ کن فکاں تم ہو

حریمِ عرش میں دیکھا ہے تم کو محوِ آئینہ

جہاں میں جلوہ گر ہو کر بھی اک رازِ نہاں تم ہو

تمہیں سے باغِ عالم میں ہے رونق یا رسول اللہ

ازل سے گلشنِ ہستی میں بس نکہت فشاں تم ہو

چمن میں غنچۂ و گل، چرخ پہ مہر و مۂ و اختر

تمہیں سے سب منور ہیں کہ ان میں ضوفشاں تم ہو

ملائک کیا بشر جن و پری نازاں ہیں سب تم پر

خوشا اے ہادیٔ اکبر شفیع انس و جاں تم ہو

فقیرِ وارثی ستارؔ بھی ہے طالبِ رحمت

رفیقِ حق تعالیٰ ہمدمِ خستہ دلاں تم ہو