جمالِ ذاتِ الٰہی کا آئنہ تم ہو

جمالِ ذاتِ الٰہی کا آئنہ تم ہو

سراپا معنیٔ والشمس والضحیٰ تم ہو

ہیں شرحِ آیۂ والیل گیسوئے مشکیں

سحابِ لطف و کرم شاہِ دوسرا تم ہو

نہ دیکھا تم سا حسیں کوئی بھی زمانے میں

فروغِ دیدہ و راں حسنِ دل کشا تم ہو

تمہی ہو بربطِ رحمت پہ نغمۂ یزداں

جہانِ حسن میں محبوبِ کبریا تم ہو

طبیبِ عالمِ امکاں سراپا لطف وکرم

خوشا کہ چارہ گر دردِ لا دوا تم ہو

نہ تخت و تاج کی حسرت نہ مال و زر کی ہوس

خدا کا شکر کہ بس میرا مدعا تم ہو

تمہاری چشمِ کرم کا ہے منتظر ستارؔ

کہ اس غریب کا سرکار آسرا تم ہو