صورتِ زیبا پیکرِ تاباں، حسنِ مکمل نورِ مجسم

صورتِ زیبا پیکرِ تاباں، حسنِ مکمل نورِ مجسم

مالکِ کوثر، لطفِ فراواں، جانِ مسیحا عزتِ آدم

شانِ تکلم، شرح قرآں، موجِ تبسم، نور کا طوفاں

شمعِ شبستاں، روئے درخشاں، عہدِ بہاراں، بخششِ پیہم

حسنِ خدائے پاک کا مظہر، سب سے برتر سب سے بہتر

سارے جہاں سے ارفع و اعلیٰ، سب سے مکرم سب سے معظم

جلوہ فزائے عالمِ امکاں، رازِ عروجِ ہستیٔ انساں

رحمتِ یزداں، نازشِ دوراں، فخرِِ رسولاں سیدِ عالم

فیض و عطا سے کون مبرا، جود و سخا سے کون ہے خالی

کس پہ نہیں ہے آپ کا احساں، کس پہ نہیں ہے لطفِ پیہم

اوجِ رسائے فہم بھی آقا، آپ کی گردِ پا کو نہ پہنچی

آپ سراپا بحرِ کرم ہیں، میں ہوں فقط اک قطرۂ شبنم

ایک مری یہ جانِ حزیں کیا، ماہ و انجم نیرِ تاباں

غنچہ و گل سب گلشنِ ہستی، آپ پہ قرباں شاہِ دو عالم

آنکھوں میں میری جلوۂ وارث اور لبوں پہ اللہ اکبر

دل پہ منقش اسمِ محمد، صلی اللہ علیہ وسلم

سائلِ در ستارؔ کو بھی اب کیجے عطا وہ لطفِ نظارہ

قلب و نظر ہوں محوِ تجلی آنکھ ہو وقفِ گریۂ پیہم