محمد مطلعٔ نورِ ازل ہیں شاہِ خوباں ہیں

محمد مطلعٔ نورِ ازل ہیں شاہِ خوباں ہیں

محمد سیدِ کونین ہیں، محبوب یزداں ہیں

محمد کعبۂ ایماں محمد قبلۂ جاں ہیں

محمد جلوۂ زیبا، محمد شمعِ عرفاں ہیں

محمد نیرِ نورِ خدا ہیں کنزِ مخفی ہیں

محمد فخرِِ حق ہیں فخرِِ عالم فخرِِ انساں ہیں

محمد تاجدارِ بحر و بر شاہِ دو عالم ہیں

محمد مصطفیٰ صل علیٰ، نبیوں کے سلطاں ہیں

محمد بارشِ لطف و کرم فیضِ مسلسل ہیں

محمد ہی ازل سے چارہ سازِ درد منداں ہیں

محمد کو عجب شان و حشم حق نے عطا کی ہے

وہ ہر غم کا مداوا دردِ بے درماں کا درماں ہیں

ہو چشمِ مست وہ گیسو وہ عارض وہ دہن بینی

مری نظروں میں تو ستارؔ سب آیاتِ قرآں ہیں