ترا اسمِ مبارک وجہِ تسکینِ دل و جاں ہے

ترا اسمِ مبارک وجہِ تسکینِ دل و جاں ہے

ترے رخ کا تصور عاشقوں کا دین و ایماں ہے

دو عالم کی جبینیں تیرے سنگِ در پہ جھکتی ہیں

کہ تیرا آستاں ہی جلوہ گاہِ حسنِ جاناں ہے

جہانِ رنگ و بو کی آبرو قائم تجھی سے ہے

کہیں تو ماہِ تاباں ہے کہیں مہرِ در خشاں ہے

زمیں سے آسماں تک آسماں سے عرشِ اعظم تک

جو جلوہ ہے جہاں بھی ہے ترا ممنونِ احساں ہے

ستاروں میں گلوں میں کہکشاں میں آبشاروں میں

جدھر بھی دیکھتا ہوں میں ترا حسنِ نمایاں ہے

میری روحِ عبادت ہے تو ہی اے جانِ محبوبی

ترا دردِ محبت ہی متاعِ دین و ایماں ہے

تری چوکھٹ پہ میں آنکھیں ملوں اور دم نکل جائے

ترے ستارؔ کا آقا یہی بس ایک ارماں ہے