مرحبا شاہِ امم، یہ شان و رفعت آپ کی

مرحبا شاہِ امم، یہ شان و رفعت آپ کی

ساکنینِ عرش بھی کرتے ہیں مدحت آپ کی

آپ محبوبِ خدا ہیں آپ فخرِ انبیا

سب سے بڑھ کر ہے خدا کے بعد عظمت آپ کی

بے نیاز دو جہاں ہو کر ملا اللہ سے

ہوگئی جس پہ بھی اک نظرِ عنایت آپ کی

ہو گیا عاشق خدا خود اپنی ہی تخلیق پر

اس طرح کچھ بھا گئی سرکار صورت آپ کی

دے کے قرآنِ مبیں فرما دیا اللہ نے

حشر تک قائم رہے گی اب حکومت آپ کی

حشر میں چھپتے پھریں گے وہ ندامت سے مگر

ڈھونڈہی لے گی گنہگاروں کو رحمت آپ کی

ہے سگِ در آپ کا ستارؔ عاصی بھی حضور

دو جہاں میں اس کو بس کافی ہے نسبت آپ کی