مری چشمِ تصور میں وہی معراج والا ہے

مری چشمِ تصور میں وہی معراج والا ہے

جو شاہِ حسن ہے سب مہ جبینوں سے نرالا ہے

سراپا رحمتِ عالم ہے وہ مالک خدائی کا

کہ جس کی جُنبشِ ابرو عطائے حق تعالیٰ ہے

نچھاور عرش سے ہوتے ہیں پھول اس پر درودوں کے

بڑے نازوں سے اس کو آمنہ بی بی نے پالا ہے

حسیں ایسا کہ اُس کی دید دیدارِ الٰہی ہے

خدا کے نور کا اُس کے رخِ روشن پہ ہالہ ہے

وہی بھرتا ہے سب کے نعمتِ کونین سے دامن

سہارا دے کے جس نے گرنے والوں کو سنبھالا ہے

غریبوں کو عطا کرتا ہے وہ صدقہ نواسوں کا

دُرِ مقصود جس نے کاسۂ ہستی میں ڈالا ہے

تصدق اس پہ ہوں ستارؔ یہ مہر و مہ و انجم

کہ جس کے روئے انور سے دو عالم میں اجالا ہے