مرتبہ حشر میں اُس کا ہی دوبالا ہوگا

مرتبہ حشر میں اُس کا ہی دوبالا ہوگا

دل میں جس نے غمِ محبوب کو پالا ہوگا

قالبِ نور میں خالق نے جو ڈھالا ہوگا

حُسنِ محبوب کا صدقہ بھی نکالا ہوگا

راہِ طیبہ میں غمِ آبلہ پائی کیوں ہو

پھول بن پائے گا جو پاؤں میں چھالا ہوگا

ہوگیا ہوگا فلک دیکھ کے پانی پانی

ہاتھ سر کار نے پْیالہ میں جو ڈالا ہوگا

کُنجیاں حق نے خزانوں کی جو دے دیں ان کو

بند ان کے لئے کب کوئی بھی تالا ہوگا

حشر میں ڈھونڈیں گے سرکار گنہ گاروں کو

کام جو آپ کا ہوگا وہ نرلاہوگا

دل تو دل ہی ہے نہ پھسلے گا قدم بھی اس کا

جس کو آقا کی عنایت نے سنبھالا ہوگا

مل سکا ہے نہ ملے گا کبھی ثانی اُن کا

لاکھ عالم نے دوعالم کو کھنگالا ہوگا

مُنکرِ عظمتِ سرکار کی صورت دیکھو

داغ ماتھے پہ ہے منہ حشر میں کالا ہوگا

ہر منافق پہ کھُلی ہوگی نبی کی عظمت

نام لے لے کے جو مسجد سے نکالا ہوگا

جلوۂ سرورِ عالم کی بدولت شبنمؔ

قبر میں میری اُجالا ہی اُجالا ہوگا