اے حضرت خیرالوریٰ رحمے بہ حالِ زار ما

اے حضرت خیرالوریٰ رحمے بہ حالِ زار ما

اے بادشاہِ دوسرا، رحمے بہ حالِ زار ما

تم صاحبِ لولاک ہو نورِ خدائے پاک ہو

اے رونقِ عرشِ علیٰ، رحمے بہ حالِ زار ما

اے لاڈلے اللہ کے، اے چاند عبداللہ کے

بی آمنہ کے مہ لقا، رحمے بہ حالِ زار ما

محمود و احمد نام ہے، پیارا محمد نام ہے

اے لائقِ صل علیٰ، رحمے بہ حال زار ما

اے رحمت اللعالمیں، اے افتخار مرسلیں

اے شافع روزِ جزا، رحمے بہ حال زار ما

دست کرم ہے در فشاں مخلوق کے روزی رساں

اے منبع جود و سخا، رحمے بہ حالِ زارِ ما

تم کو پیمبر جان کر، آیا گواہی کو شجر

پتہ ہر اک کہنے لگا، رحمے بہ حالِ زار ما

آتش ہوئی گل برگِ تر حضرت خلیل اللہ پر

تم کو صدا دے بر ملا، رحمے بہ حالِ زار ما

خالق سے بخشائی خطا آدم نے جس دن دی صدا

پوتے محمد مصطفیٰ، رحمے بہ حالِ زارِ ما

کر دے مرا دکھ پر طرف بہرِ رسولان سلف

اے دستگیر انبیا، رحمے بہ حالِ زار ما

بیمار کا درماں کرو محتاج پر احساں کرو

اے خلق کے مشکل کشا رحمے بہ حالِ زار ما

دکھ درد غم سب دور ہو رنج و الم سب دور ہو

صدقہ سرِ شبیر کا، رحمے بہ حالِ زار ما

دو مال و زر بہرِ خدا قرضے میں ہوں میں مبتلا

ٹل جائے سر سے یہ بلا رحمے بہ حال زار ما

دریائے غم ہے جوش پر بیڑے کو میرے پار کر

ڈوبے ہوؤں کے ناخدا رحمے بہ حالِ زارِ ما

عصیاں سے میں ہوں زرد روز رہ جائے میری آبرو

بہر بتول پارسا، رحمے بہ حالِ زارِ ما

ہر دم ہے خوفِ جاں مجھے ہو پل صراط آساں مجھے

اے انبیا کے پیشوا رحمے بہ حالِ زارِ ما

تاریک مدفن کا ہے ڈر تم مہر کی کرنا نظر

اے مظہرِ نورِ خدا، رحمے بہ حالِ زار ما

یہ چاہتا ہے میرا جی تیری بدولت اے نبی

پاؤں میں جنت کی فضا رحمے بہ حالِ زارِ ما

حوریں ہوں میری خدمتی نعمت عطا ہو خلد کی

کوثر ملے تب ہے مزا رحمے بہ حالِ زارِ ما

تیرا شفاعتؔ مدح خواں پائے مصائب سے اماں

افلاس ہے بے انتہا، رحمے بہ حالِ زار ما