میرے نالوں نے عجب دھوم مچا رکھی ہے

میرے نالوں نے عجب دھوم مچا رکھی ہے

چرخ کی طرح زمیں سر پہ اٹھا رکھی ہے

جب خیال آیا بس ایک بار لگا دل کھنچنے

کیا کہوں آپ نے کیا لاگ لگا رکھی ہے

آہ کے ساتھ ہی فریاد بھی پہنچے گی وہاں

نردباں ہم نے فلک پر یہ لگا رکھی ہے

خاک کر دے گی جلا کر یہ کسی روز مجھے

تپِ فرقت نے تو ایک آگ لگا رکھی ہے

جھانک کر دیکھے گا وہ رشکِ قمر کھڑکی سے

شکل دیوانوں کی یوں ہم نے بنا رکھی ہے

بت پرستی جو نہیں ہے تو یہ کیا ہے اکبرؔ

تم نے تصویرِ صنم دل میں چھپا رکھی ہے