ہر شئی میں جلوہ گر ہے واللہ نور تیرا

ہر شئی میں جلوہ گر ہے واللہ نور تیرا

حیرت میں ڈالتا ہے سب کو ظہور تیرا

از ماہ تا بہ ماہی ظاہر تری خدائی

کرتا ہے ناز تجھ پر کبر و غرور تیرا

پتھر کو کر کے سرمہ آنکھوں کو نور بخشا

احسان ہے جہاں پر اے برقِ طور تیرا

کعبہ میں گر خدا ہے تو بت کدہ میں کیا ہے

اے عقل سے سراسر ثابت قصور تیرا

دیر و حرم میں یکساں دیکھا ہے تیرا جلوہ

یاں بھی ہے نور تیرا واں بھی ہے نور تیرا

مشتاق تیرے اٹھ کر دوڑیں گے بے تحاشا

جب نام لے گی خالق آوازِ صور تیرا

اب وقت ہے مدد کا اے چشمِ مست ساقی

کرتا ہے کچھ کمی سی دل میں سرور تیرا

وحشت کا میری چرچا عالم میں ہو رہا ہے

شہرہ جہان میں ہے نزدیک و دور تیرا

تو اس کو بخش دنیا لطف و کرم سے اپنے

اکبرؔ کو آسرا ہے ربِ غفور تیرا