جاتی ہی نہیں دل سے تمنائے مدینہ

جاتی ہی نہیں دل سے تمنائے مدینہ

پھرتا ہے مری آنکھوں میں صحرائے مدینہ

مقصد یہی میرا ہے گر شرط ادب سے

لب پر نہیں آتا کہ ہوں شیدائے مدینہ

دل میں ہے کہ مر کر بھی نہ نکلیں گے وہاں سے

اب کے ہمیں تقدیر جو دکھلائے مدینہ

سودا ہو جو سر میں تو مدینہ کے سفر کا

ہو عشق تو عشق شہ والائے مدینہ

ہر مرتبہ بڑھتا ہی گیا ولولۂ شوق

کیا لطف دکھاتی ہے تمنائے مدینہ

کعبے گیے تھے ڈھونڈھنے ہم ہند سے جس کو

تھا دل میں وہی انجمن آرائے مدینہ

کعبہ سے میرا خانۂ دل کم نہیں اکبرؔ

روشن ہے یہاں شمع تجلائے مدینہ