تیرا جمال، جمالِ خدا معین الدین

تیرا جمال، جمالِ خدا معین الدین

نہیں ہے تجھ سا کوئی دل ربا معین الدین

ولیٔ ہند عطائے نبی غریب نواز

تو شمعِ انجمنِ مصطفیٰ معین الدین

زمینِ ہند معطر ہے تیری خوشبو سے

تو باغِ قدس کی بادِ صبا معین الدین

ہے آفتابِ ہدایت زمانے بھر کے لیے

شبِ جہاں تیرا نقشِ پا معین الدین

شرابِ چشت سے مخمور کر دیا عالم

ہر ایک رند کے لب پر ہے یا معین الدین

جو ایک بار تیرے آستاں پہ جھک جائے

وہ سر کہیں بھی نہ پھر جھک سکا معین الدین

تیرے جمال کو آنکھیں ترس گئیں خواجہ

نقاب رخ سے اٹھا، آ بھی جا معین الدین

میرے بھی حال پہ چشمِ کرم حبیب اللہ

میرا بھی غم ہے غمِ لا دوا معین الدین

نہ مانگنے کا سلیقہ نہ واقفِ آداب

پڑا ہے در پہ تیرے اک گدا معین الدین

زہے نصیب کہ ہم آپ کے غلام ہوئے

ہزار شکر کہ ہے پیشوا معین الدین

فقیرِ میکدۂ چشت ہے علیم اللہ

اسے بھی ساغرِ عرفاں پِلا معین الدین