ہوا وابستہ دل موئے نبی سے

ہوا وابستہ دل موئے نبی سے

کھلی تقدیرِ گیسوئے نبی سے

چمن میں اوس پھولوں پر پڑی ہے

مقابل ہو کے خوشبوئے نبی سے

مری میت کو دامن میں چھپا لے

ہے اتنی التجا کوئے نبی سے

ہوئے بیہوش موسیٰ جل گیا طور

فروغِ جلوۂ روئے نبی سے

صبا لے چل اڑا کر خاک میری

محبت ہے مجھے کوئے نبی سے

خجل ابروئے پُر خم سے مہِ نو

قمر شرمندہ ہے روئے نبی سے

تری جنت کو رضواں ہم نے دیکھا

یہ ملتی جلتی ہے کوئے نبی سے

دلِ اشرفؔ کی یارب التجا ہے

نہ چھوٹے دام گیسوئے نبی سے