خبر لو مرے رہنما غوث الاعظم

خبر لو مرے رہنما غوث الاعظم

نہیں کوئی حامی مرا غوث الاعظم

شہِ ملکِ جیلاں مہِ اوج عرفاں

کروں آپ کی کیا ثنا غوث الاعظم

قدم آپ کا دوش پر ہر ولی کے

زہے سید الاؤلیا غوث الاعظم

خدا یاد آئے مجھے بیخودی میں

وہ جامِ محبت پلا غوث الاعظم

چھڑا دیں گے مجھ کو بھی قیدِ بلا سے

گداؤں کے حاجت روا غوث الاعظم

ابھی مشکلیں حل ہوں سارے جہاں کی

اٹھائیں جو دستِ دعا غوث الاعظم

پڑے ناؤ منجدھار میں بھی تو کیا غم

کہ میرے تو ہیں ناخدا غوث الاعظم

مجھے خواب ہی میں دکھا روئے روشن

مرا بخت خفتہ جگا غوث الاعظم

کہاں تک مرض میں رہیں مبتلا ہم

عطا جلد ہو اب شفا غوث الاعظم

قیامت میں اشرفؔ کا ہے یہ سہارا

کہ ہے آپ کا اک گدا غوث الاعظم