خالق ایجاد کیا کہنا تری ایجاد کا

خالق ایجاد کیا کہنا تری ایجاد کا

آدمی پتلا ہے آب و خاک نار و باد کا

ہے تو ہی گلزارِ خوبی رونقِ باغِ جہاں

پتہ پتہ یک زباں ہے گلشنِ ایجاد کا

سر میں سودا ہو اگر یارب تو سودائے نبی

ذوق پیدا ہو اگر دل میں تو تیری یاد کا

اے خیالِ مرگ قرباں تجھ پہ عمر جاوداں

تیرے صدقے مل گیا موقع خدا کی یاد کا

قبر میں بھی اے خوشا قسمت کہ وہ بھولے نہیں

مر کے بھی ممنون احساں ہوں کسی کی یاد کا

جو گیا وہ لوٹنے کا نام ہی لیتا نہیں

جانے کیا پر کیف عالم ہے عدم آباد کا

ہم صفیر و پوچھتے کیا ہو نشانِ بے نوا

ہے تخلص شاہؔ ساکن ہوں عظیم آباد کا