نسیم گلفشاں ہے ذکر میرے شاہِ خوباں کا

نسیم گلفشاں ہے ذکر میرے شاہِ خوباں کا

کہ جس کا یک تبسم مسکرانا ہے گلستاں کا

مسلسل ہے کرم کشتِ امید زندگانی پر

میرے مژگان لرزاں اشک رقصاں چشم گریاں کا

محبت خلق سے مقصود ہے مفہوم قرآں کا

شعور فطرتِ انساں ہے غم عرفان انساں کا

رۂ حق میں مٹایا جس نے ہستی ہوگیا باقی

کہ ہر یک قطرہ کعبہ بن گیا خونِ شہیداں کا

سر فاراں سے اُٹھا ابر گوہر بار عرفاں کا

چمن آتش بداماں رنگ بدلا ہے گلستاں کا

زمین و آسماں ورثہ میں ہے نور ولایت کے

یہ وسعت سبزہ زاروں کی یہ منظر کوہساروں کا

سحابِ ابر رحمت نور ایمان بارِ ایقاں کا

سفینہ بن گیا ہے زور بحرِ موج عصیاں کا

خیال زلف واللیل اذا یغشیٰ سے ملتا ہے

رخِ زیبا تجلی ہے ہماری چشمِ حیراں کا

کسی کی چشم گریاں رنگ ہے بزم چراغاں کا

کس کے رخ کا جلوہ نور ہے آیاتِ قرآں کا

الٰہیات اور ادراک فنِ شعر کیا نسبت

کہاں وہ مرتبہ سالکؔ غزالی کا غزل خواں کا