دعوتِ توحید سنت اؤلیااللہ کی

دعوتِ توحید سنت اؤلیااللہ کی

کیا مسلم ہے نیابت اؤلیااللہ کی

اسم یا ھادی کا مظہر اؤلیااللہ ہیں

لے ہدایت کر زیارت اؤلیااللہ کی

جرعۂ جاں بخش سیرت اؤلیااللہ کی

جامِ کوثر ہے محبت اؤلیااللہ کی

فخرِ کل ذاتِ گرامی ہے رسول اللہ کی

ذات ہے فخر نبوت اؤلیااللہ کی

زندگی کا نور قربت اؤلیااللہ کی

انتشار قلب نفرت اؤلیااللہ کی

مجھ سا یک ناکارہ منکر ہو گیا تو کیا ہوا

ہے عطا حق فضیلت اؤلیااللہ کی

عرس کیا ہے ایک دعوت اؤلیااللہ کی

کون کہتا ہے یہ بدعت اؤلیااللہ کی

چند سجدے وہ بھی روکھے پھیکے بے کیف و سرور

شان کیا جانیں گے حضرت اؤلیااللہ کی

کیا بیاں ہو مجھ سے عظمت اؤلیااللہ کی

تمغۂ لا خوف آیت اؤلیااللہ کی

کاشفِ علم لدنی واقفِ رمزِ حرم

رمزِ قرآں ہے سیادت اؤلیااللہ کی

ہے زباں مصروف سیرت اؤلیااللہ کی

دل میں اور آنکھوں میں صورت اؤلیااللہ کی

معجزے سب ختم ہیں وہ تھے نبی کے واسطے

آج جاری ہے کرامت اؤلیااللہ کی

معنی عرفان رویت اؤلیااللہ کی

صد سعادت ہے زیارت اؤلیااللہ کی

اپنی خوش بختی پہ سالکؔ ناز بے جا تو نہیں

موجب رحمت ہے نسبت اؤلیااللہ کی