دنیا میں جو با ایمان آیا دنیا سے وہ با ایمان گیا

دنیا میں جو با ایمان آیا دنیا سے وہ با ایمان گیا

جو لے کے نرالی شان آیا وہ لے کے نرالی شان گیا

مانی سے ترا نقشہ نہ کھینچا بے مثل تجھے وہ مان گیا

بہزاد تجھے وہ پہچان گیا ہر ایک مصور جان گیا

جب چاند ہوا تھا دو ٹکڑے انگلی کے اشارے سے تیرے

سورج بھی اسی دن سے تجھ کو اے مہرِ عرب پہچان گیا

اک رات کو سوئے عرش بریں پھر عرش سے سوئے فرش زمیں

انسان علی الاعلان آیا انسان علی الاعلان گیا

ہر چند بشر ہے خاک بسر لیکن ہے ملک سے افضل تر

جبریل جہاں تک جا نہ سکے رف رف پہ وہاں انسان گیا

انسان خودی کی مورت ہے انسان خدا کی صورت ہے

انجان جو تھا انجان رہا جو جان گیا وہ جان گیا

جس وقت گیا پہلو سے محسنؔ کو سنا تھا یہ کہتے

اک دل ہی ماتم کیا کم تھا ساتھ اس کے مرا ارمان گیا