اے غلامانِ نبی روضۂ مولیٰ دیکھو

اے غلامانِ نبی روضۂ مولیٰ دیکھو

ہند میں کرتے ہو کیا چل کے مدینہ دیکھو

دیدۂ دل سے رخِ سیدِ والا دیکھو

دیکھو اللہ کی قدرت کا تماشہ دیکھو

مرضِ ہرج سے عاشق کو ابھی صحت ہو

نبض تم آ کی جو اے فخرِ مسیحا دیکھو

طور پر طالبِ دیدار ہوئے تھے جس کے

اس کے مطلوب کو یا حضرت موسیٰ دیکھو

رخ ہے والشمس تو واللیل ہے گیسوئے نبی

قدرتِ حق ہے سراپا قد رعنا دیکھو

نگہِ لطف و کرم سے دل نالان کی طرف

دیکھو دیکھو میرے آقا میرے مولیٰ دیکھو

اک نہ اک دن نظر آ جائے تمہیں بھی وہ جمال

چشم حق بیں سے جو اے دیدۂ بینا دیکھو

شبِ معراج یہ حوروں سے ملک کہتے تھے

وہ قریب آ گئی لو شاہدِ بطحیٰ دیکھو

خوف سے اہلِ فلک کانپ اٹھیں یا حضرت

آنکھ اٹھا کر جو سوئے عالم بالا دیکھو

کاش رویا ہی میں فرمائیں الٹ کر وہ نقاب

یوں دکھاتے ہیں جمالِ رخ زیبا دیکھو

آبروؔ کعبۂ خالق کی زیارت کی بعد

تم مدینہ کو چلو شاہ کا روضہ دیکھو