گہہ نور ہوں اللہ کا گہہ عین کی جاں ہوں

گہہ نور ہوں اللہ کا گہہ عین کی جاں ہوں

خورشید حقیقت ہوں شہہ کون و مکاں ہوں

آئینۂ حیرت ہوں میں کس جا ہوں کہاں ہوں

یہ شان ہے اپنی کبھی یاں ہوں کبھی واں ہوں

جب غور سے دیکھو تو کھلے میری حقیقت

کیا حال کہوں اپنا میں کیا چیز میاں ہوں

ہر آن نیا رنگ نیا ڈھنگ ہے اپنا

میں ہستی بیحد ہوں عیاں ہوں نہ نہاں ہوں

گلدستۂ عظمت ہوں میں گلزار ازل ہوں

گلشن ہوں گلستاں ہوں گل غنچہ دہاں ہوں

میں نور الٰہی ہوں حقیقت ہے یہ اپنی

ہر شے میں ہر اک شان میں جو کچھ کہو ہاں ہوں

جاں باز ہوں دیوانہ گیسوئے نبی ہوں

پروانۂ شمع رخ مولائے جہاں ہوں

ہر قالب ذی جاں میں نئے رنگ سے کیفیؔ

میں روح ہوں میں جان ہوں میں امن و اماں ہوں