دل میں بھرا ہے کیف و سرور محمدیؐ

دل میں بھرا ہے کیف و سرور محمدیؐ

پیتے ہیں ہم شراب طہور محمدیؐ

اک لفظِ کن کی شرح یہ کل کائنات ہے

مقصد ہے لفظِ کن کا ظہور محمدیؐ

بندے خداے پاک کی صورت کو دیکھ لیں

اس واسطے ہوا ہے ظہور محمدیؐ

حسن و جمال و عشق بھی ہمرکاب تھے

اس شان سے ہوا ہے ظہور محمدیؐ

حاصل ہے اس کو قرب و حضور خدائےپاک

حاصل ہے جس کو قرب و حضور محمدیؐ

منوا دیا کہ ذات خدا لا شریک ہے

اللہ رے عقل و فہم و شعور محمدیؐ

بجھتا نہیں بجھائے سے اسلام کا چراغ

چھپتا نہیں چھپائے سے نور محمدیؐ

بیساختہ ملک شبِ معراج کہہ اٹھے

اللہ رے تجلی نورِ محمدیؐ

حق نے کہا کہ جائیو جبریل با ادب

نازک بہت ہے طبع غیورِ محمدیؐ

اصحاب جو کہ عاشق صادق تھے سب کے سب

رہتے تھے با ادب بحضور محمدیؐ

موسیٰ اسی زمیں پہ ہے طور آپ کا

اور عرش سے بھی آگے ہے طور محمدیؐ

طاہر تو میں ہی بلکہ مطہر بھی ہیں تمام

پیتے ہیں جو شرابِ طہور محمدیؐ

بے حکم کرد گار نہ تھا ان کا کوئی حکم

یوں واجب العمل ہیں امور محمدیؐ

میرے گناہ میری خطائیں ہیں جس قدر

کر دے معاف رب غفور محمدیؐ

ہے اپنے دل پہ ناز ولیؔ اس لئے مجھے

دل میں بھرا ہے کیف و سرور محمدیؐ