اللہ اللہ جلوۂ حسن ملیح مصطفیٰ

اللہ اللہ جلوۂ حسن ملیح مصطفیٰ

بارک اللہ نگہتِ جسمِ صبیح مصطفیٰ

کل بلیغان عجم اورکل فصیحان عرب

لے رہے تھے لذت نطق فصیح مصطفیٰ

ہر مریض مصطفیٰ کو دیکھ کر بولے مسیح

یہ مریض مصطفیٰ ہے یا مسیح مصطفیٰ

اُدنُ منی تھا شب معراج فرمانِ خدا

اور تھا لبیک ارشاد صحیح مصطفیٰ

کام جتنے بھی کئے حضرت نے پاکیزہ کئے

ہاں بتائے تو کوئی فعلِ قبیح مصطفیٰ

حکمِ حق مانو مجھے چاہو مجھی پر جان دو

عشق والو ہے یہی حکم صریح مصطفیٰ

حضرت اسماعیل نے پایا ذبیح اللہ لقب

اورکہلاتا ہے ہر عاشق ذبیح مصطفیٰ

کر کے دو ٹکڑے قمر کے کر دیا دونوں کو ایک

اے ولی ؔ دیکھا بھی اعجاز صحیح مصطفیٰ