یا محمدؐ باعث ایجادِ عالم آپ ہیں

یا محمدؐ باعث ایجادِ عالم آپ ہیں

زینتِ کون و مکاں اور عرشِ اعظم آپ ہیں

فخرِ آدم آپ ہیں اور فخر عالم آپ ہیں

سب کے رہبر آپ ہیں اور سب کے ہمدم آپ ہیں

جوملاتی ہے خدا سے وہ ہے تعلیم آپ کی

جس سے ملتا ہے خدا وہ اسمِ اعظم آپ ہیں

دوست کیا دشمن بھی تو کرتے ہیں تعریف آپ کی

بات سچی ہے یہی خلقِ مجسم آپ ہیں

میرے جان و دل جسے ہر وقت کرتے ہیں تلاش

ڈھونڈتی ہے جس کو میری چشم پرنم آپ ہیں

انبیاء جیتے ہوئے افضل ہوئے اعلیٰ ہوئے

سب سے افضل اور مکرم اور معظم آپ ہیں

عالم ِ انوار کی زینت ہے دم سے آپ کے

نورِ حق ہیں آپ اور نورِ مجسم آپ ہیں

آپ کے پیش نظر ہر وقت ہے ذات خدا

سامنے اللہ کے واللہ ہر دم آپ ہیں

آپ کی الفت کا دم بھرتے ہیں سب اس واسطے

عاشقانِ خستہ کے ہمراز و ہمدم آپ ہیں

قبر کا اور حشر کا اور نشر کا ہر بات کا

اس ولیؔ کو غم ہی کیا ہے ماحئی غم آپ ہیں