کہہ رہے ہیں عارفانِ رحمۃ للعالمیں

کہہ رہے ہیں عارفانِ رحمۃ للعالمیں

ہے خدا کی شان شانِ رحمۃ للعالمیں

مرحبااے عاشقانِ رحمۃ للعالمیں

خوب پہچانی ہے شانِ رحمۃ للعالمیں

پڑھ کے قرآں میں بیانِ رحمۃ للعالمیں

ہوگیا اظہار شانِ رحمۃ للعالمیں

سینۂ عشاق ہے ان کا مقامِ کفشِ پا

دیدۂ ودل ہے مکانِ رحمۃ للعالمیں

بے خبر کو کیا خبر حضرت تھے مہمانِ خدا

یا خدا تھا میہمانِ رحمۃ للعالمیں

رحمۃللعالمیں آرامِ جانِ عاشقان

ذات حق آرامِ جان رحمۃ للعالمیں

قاب قوسین اور او ادنیٰ کے معنی سے کھلا

مطلب تیر و کمانِ رحمۃ للعالمیں

خضر ہو تم کو مبارک چشمۂ آب حیات

اور ہمیں آب دہانِ رحمۃ للعالمیں

خوف دوزخ شور محشر پر سشِ اعمال سے

مطمئن ہیں عاشقانِ رحمۃ للعالمین

دنگ ہیں اہلِ فلک حیران ہیں اہلِ زمیں

دیکھ کر اعزاز و شانِ رحمۃ للعالمیں

چین آجائے جو ان آنکھوں سے یارب دیکھ لوں

روضۂ جنت نشانِ رحمۃ للعالمیں

ایک قطرہ بھی نہ چھوڑا بادۂ توحید کا

پی گئے سب میکشانِ رحمۃ للعالمیں

آرہی ہے صوتِ پاک اُدنُ منی یا حبیبؐ

پڑھ رہا ہے کاروانِ رحمۃ للعالمیں

جنتوں کی آرزو ہے ہم کو اے پروردگار

رکھ دے زیر آستانِ رحمۃ للعالمیں

کچھ دنی سے کچھ تدلیٰ سے پھر او ادنیٰ سے صاف

ہو گیا اظہار شانِ رحمۃ للعالمیں

اے مسیحا قم باذن اللہ پہ تجھ کو ناز ہے

دیکھ حکم کن فکان رحمۃ للعالمیں

مذہب عشق ومحبت مسلک توحید پر

چل رہے ہیں سالکانِ رحمۃ للعالمیں

اے ولیؔ روح الامیں کے ساتھ تو بھی شوق سے

چوم سنگ آستانِ رحمۃ للعالمیں