محبوب خدا مکی مدنی اللہ غنی اللہ غنی

محبوب خدا مکی مدنی اللہ غنی اللہ غنی

مطلوبِ خدا یثرب کے دھنی اللہ غنی اللہ غنی

وہ جسم مبارک صل علی تھا نورکا پتہ سایہ نہ تھا

کہتے ہیں اسے نازک بدنی اللہ غنی اللہ غنی

وہ نورِ منور شانِ خدا وہ چاند سا مکھڑا ماہ لقا

ہے اس کی عجب جلوہ فگنی اللہ غنی اللہ غنی

وہ زلفِ دوتا کالی کالی واللیل نما خوشبو والی

صدقے اس پر مشکِ ختنی اللہ غنی اللہ غنی

وہ چشمِ سیہ وہ کحلِ بصر جس سے کہ خدا آتا ہے نظر

ہے اس میں عجب جادو فگنی اللہ غنی اللہ غنی

دندانِ مبارک کی وہ چمک اور ان کی چمک میں خاص دمک

ہے دل سے فدا در عد نی اللہ غنی اللہ غنی

اب دونوں رشک لعلِ یمن اللہ سے ہر دم گرمِ سخن

ہے ان پہ فدا لعل یمنی اللہ غنی اللہ غنی

محبوب خدا اورختم رسل سلطانِ زماں اور سرور کل

دنیا کے اور عقبیٰ کے دھنی اللہ غنی اللہ غنی

جاتا تھا جدھر وہ نور خدا جاتا تھا مہک ہر اک کوچہ

مشہور ہے اس کی گلبدنی اللہ غنی اللہ غنی

دنیا میں جب آئے شاہِ رسل بیکار ہوئے سب لات و ہبل

دکھلائی نرالی بت شکنی اللہ غنی اللہ غنی

مردوں کو حیات طیبہ دی زندوں کو مسیحائی بخشی

اللہ رے تری شیریں سخنی اللہ غنی اللہ غنی

جس کا ترے آگ سر نہ جھکے جو تیرے قدم پر سر نہ رکھے

واللہ وہ ہے گردن زدنی اللہ غنی اللہ غنی

جب تم نے مکہ فتح کیا دی سب کو اماں بحکم خدا

یہ تھی شان حب الوطنی اللہ غنی اللہ غنی