گر خدا را دوست داری مصطفیٰ را دوست دار

اگر تو خدا کو دوست رکھتا ہے تو حضرت محمد مصطفیٰ کو دوست رکھ اور اگر حضرت محمد مصطفیٰ کا چاہنے والا ہے تو حضرت علی مرتضیٰ سے محبت رکھ۔

اگر تو نے صداقت اور خلوص سے خرقۂ (طریقت) پہنا ہے تو اس خرقہ کی نسبت کو پہچان اور آل عبا (پنجتن پاک) سے محبت رکھ۔

درد مندی کے ساتھ آ اور درد محبت کی تلچھٹ پی جا، اگر تو بیمار محبت ہے تو تیرے لیے بہت اچھا ہے کہ دوا سے بھی محبت رکھے۔

شہیدِ کربلا، کربلا میں آسودہ ہیں، انصار حسین (موالی) کی طرح تو بھی کربلائے معلی کو دوست رکھ۔

ہمارے دوست، اپنے دوستوں کے چاہنے والوں کو بھی عزیز رکھتے ہیں، ہم دوستوں کے چاہنے والے ہیں، ہم سے بھی محبت رکھ۔

نعمت اللہ ایک رند سرمست اور ساقی کا حریف ہے، ایسے خوش باش دوست سے خدا کے واسطے محبت رکھ۔