یا شہ بغداد وجیلاں آج روز عید ہے

یا شہ بغداد و جیلاں آج روز عید ہے

یاشہ اقلیم عرفاں آج روز عید ہے

آپ کے در کا بھکاری مانگتا ہے آپ سے

میرے مولا میرے سلطاں آج روز عید ہے

ہو عطا مجھ کو بھی اک جام حیات سرمدی

اے محیٔ دین و ایماں آج روز عید ہے

آپ کے درسے عطا ہوتی ہیں سب کو نعمتیں

مظہر اوصاف رحماں آج روز عید ہے

دیکھتا ہوں جلوہ فرما گوشہ دل میں تمہیں

اس لئے کہتا ہوں ہاں ہاں آج روز عید ہے

ذرہ ذرہ سے چمک اٹھی ہیں خوشیاں عید کی

اے شہ انوار تاباں آج روز عید ہے

اور تو اپنی تمنائیں کہوں کیا آپ سے

مجھ کو ہوجانے دو قرباں آج روز عید ہے

آج ہر مومن کے گھر میں عید مہماں ہوگئی

آپ ہوں قاتلؔ کے مہماں، آج روز عید ہے