جو بیٹھا ہوں لکھنے میں نعت_رسولؐ

جو بیٹھا ہوں لکھنے میں نعت رسولؐ

تو اشعار کا ہو رہا ہے نزول

جو اک حرف بھی ان کو آئے پسند

تو سمجھو ہوئی ساری محنت وصول

ملک پیش کرتے ہیں صبح و مسا

سلاموں کے گجرے درودوں کے پھول

نہ تھا کوئی ان سا نہ ہوگا کہیں

یہی کہتے ہیں سارے اہل عقول

ہیں شمس و قمر عکس روئے نبی

ہے یہ کہکشاں ان کے قدموں کی دھول

محبت نہ کیوں ہو نبی سے مجھے

کہ ہیں میرے آقا محب رسولؐ

کہاں ان سا آقا رؤف الرحیم

کہاں مجھ سا بندہ ظلوم و جہول