ذات تیری ہے غنی اقرار سے انکار سے

ذات تیری ہے غنی اقرار سے انکار سے

تو ہے بے پروا مری تخلیق سے اظہار سے

تیرے ہی پرتو سے روشن ہے یہ ساری کائنات

تو سراپا نور ہے معمور ہے انوار سے

تو علیم و تو سمیع و تو بصیر و بے نظیر

جو ملا تجھ سے جو پاؤں گا تری سرکار سے

تیری بیرنگی میں ہیں سو رنگ کی نیرنگیاں

گرم بازاری ہے تیری گرمیٔ بازار سے

تیرے جلوے ہر گھڑی تازہ بتازہ نو بہ نو

آنکھ کو سیری نہیں ہوتی ترے دیدار سے

تیری رحمت کفر و دیں کے مخمصوں سے ماورا

تجھ کو کچھ مطلب نہیں تسبیح سے زنار سے

رازؔ کو عرفان دے پہچان دے ایمان دے

وہ نہایت مضطرب ہے حسرتِ دیدار سے