الٰہی بحقِ نبی خدا

الٰہی بحقِ نبی خدا

بحق امامِ علی مرتضیٰ

الٰہی بحقِ جنابِ بتول

جگر گوشہ و نورِ چشمِ رسول

بحقِ امامِ حسن دلربا

بحقِ شہید رہِ کربلا

بحقِ امام عابدِ ذی وقار

بحقِ شہِ باقرِ نام دار

بحقِ شہ جعفر نیک ذات

بحقِ شہِ موسی ہر صفات

بحقِ امامِ جہانی رضا

بحقِ امامِ تقی با خدا

بحق امامِ نقی شاہِ دیں

بحق حسن عکسری بالیقیں

بحقِ شہِ مہدیٔ آخریں

جو ہیں جانِ جانانِ دین مبیں

بحقِ تمام آلِ پاک نبی

کہ جن پر بنا ہے کل آئین کی

بحق حضورِ جہاں غوث دیں

ہے جن کی بدولت یہ علم و یقیں

بحق تمامیٔ پیرانِ دیں

تمامیِ گلہائے بستانِ دیں

الٰہی بڑھا شان اسلام کی

سبھوں کو بنا جان اسلام کی

تری یاد سے کوئی غافل نہ ہو

تری یاد والوں کو مشکل نہ ہو

مریضوں کو کر تندرستی عطا

غریبوں کا کر ہر طرح سے بھلا

ہر اک دل کو تو نور ایماں سے بھر

تجھے ڈھونڈھ پائے سبھوں کی نظر

سدا رازؔ کا راز رکھ راز میں

صدائے محبت کو رکھ ساز میں