دکھا دے جذب_دل کی اک جھلک عشق_نبی اپنی

دکھا دے جذب دل کی اک جھلک عشق نبی اپنی

تمنا ہے مدینے میں گزاروں زندگی اپنی

محمدؐ مصطفیٰ کی سیرت اقدس کا کیا کہنا

شہہ دیں بن کے دنیا کو دکھا دی سادگی اپنی

خوشا قسمت دعائیں دیں مذمت کرنے والوں کو

زہے شفقت ہر اک دشمن سے رکھی دوستی اپنی

نہیں دنیا میں کوئی مونس و ہمدم تو کیا پروا

یہ کیا کم ہے ترے دامن سے ہے وابستگی اپنی

یقیں ہے ہم گنہ گاران امت کو کہ محشر میں

نہ دیکھی جائے گی ان سے فسردہ خاطری اپنی

شکیلؔ افسوس وقت رخصت ماہ صیام آیا

خدا پھر لائے گا یہ دن اگر ہے زندگی اپنی