فراق_و_ہجر کے حالات_غم کا ماجرا سن لے

فراق و ہجر کے حالات غم کا ماجرا سن لے

گزرتی ہے جو دل پر اے شہ ہر دوسرا سن لے

ترے دیدار کی حسرت تڑپتی ہے ان آنکھوں میں

کبھی تو اک نگاہ مضطرب کی التجا سن لے

اسی آواز میں پنہاں ہے تفسیر حیات اپنی

مرے آقا مرے ٹوٹے ہوئے دل کی صدا سن لے

عیاں ہے تجھ پہ شاید تیری امت کی زبوں حالی

یتیموں کی فغاں سن لے غریبوں کی دعا سن لے

ذرا یہ ناز کی باتیں شکیلؔ آہستہ آہستہ

نہ جانے کیا کہہ دے نہ جانے کوئی کیا سن لے