مقام_فرش_و_فلک ہی نہیں مقام_رسول

مقام فرش و فلک ہی نہیں مقام رسول

حریم عرش کی رفعت ہے زیر گام رسول

زہے بلندی اعزاز و احترام رسول

خدا کے بعد لیا جا رہا ہے نام رسول

حضور حق نہیں کچھ امتیاز شاہ و گدا

حدیث حسن مساوات ہے کلام رسول

یہ ربط خالق و مخلوق اے تعالیٰ اللہ

وہی پیام خدا ہے وہی پیام رسول

جو مدعا ہے وہ مل جائے گا بہ حکم خدا

جو مانگنا ہے طلب کیجیے بنام رسول

ذرا تو اپنی طرف دیکھ امت عاصی

ترے خیال میں گزرے ہیں صبح و شام رسول

شکیلؔ عین عبادت اسی کو کہتے ہیں

خدا کی یاد ہو دل میں زباں پہ نام رسول