مرے نبی نے درِ خدا پر سرِ خدائی جھکا دیا ہے

مرے نبی نے درِ خدا پر سرِ خدائی جھکا دیا ہے

جمالِ سیرت سے حسنِ ربی زمانے بھر کو دکھا دیا ہے

تمہارے عزمِ صمیم نے تو بدل دیا ہے جہاں کا نقشہ

گرے ہوؤں کو کھڑا کیا ہے نظامِ باطل مٹا دیا ہے

جو اپنی جانوں پہ ظلم کر لے درِ نبی پہ وہ توبہ کر لے

کریم رب نے تو بخششوں کا یہ سیدھا رستہ بتا دیا ہے

وہی ہے نوعِ بشر کا چارہ تمام نبیوں کا بھی سہارا

کہ سب نے محشر میں یاوری کو اسی نبی کا پتا دیا ہے

دلِ نبی کا گداز لوگو جہاں میں کس کی سمجھ میں آئے

کہ اس کی چاہت کے سوز نے تو شجر ہجر کو رلا دیا ہے

رہی نظر میں انہی کی صورت انہی کی مدحت انہی کی چاہت

بلال کعبے کی چھت پہ بھی گر میرے نبی نے بٹھا دیا ہے

کبھی سواری پہ بیٹھے آقا کبھی غلاموں کو بخشی عزت

یہ کس کا منشورِ آگہی ہے جو سب کو ہمسر بنا دیا ہے

شکیلِؔ بے کس بھی میرے آقا ہے اک سوالی تری عطا کا

ترے کرم نے تو بھر کے کاسے جوابِ سائل سدا دیا ہے