میں چُپ تھا ہو رہی تھی مرے ترجماں کی بات

میں چپ تھا ہو رہی تھی مرے ترجماں کی بات

پیشِ مواجہ مرے اشکِ رواں کی بات

پھوٹی نہالِ فکر سے کونپل درود کی

امڈی ہے چشمِ تر میں دلِ بے زباں کی بات

ہو ذکر کچھ تو شہ گلِ گلزارِ قدس کا

اے عندلیب جانِ گلستانِ جاں کی بات

گوشہ نشینِ غارِ حرا کا ہو تذکرہ

یا زیب و زینتِ چمنِ لامکاں کی بات

اس بوریا نشین کی مدحت محال ہے

ممکن نہیں ہے عرش کے اس میہماں کی بات

فردوس کی طلب ہے نہ دوزخ کا خوف ہے

پڑھیے درود چھوڑیے سود و زیاں کی بات

رہتا ہے تیز دھوپ سے میرا مکالمہ

ہوتی ہے روز تیرے خنک سائباں کی بات

ہے آبرو سخن کی ثنائے رسول سے

ہے سیدالکلام شہِ کن فکاں کی بات