پھر گلستانِ تخیل میں کھلا تازہ گلاب

پھر گلستانِ تخیل میں کھلا تازہ گلاب

پھر ملا ہے مدحتِ سرور کا حرفِ مستجاب

پھر وفورِ شوقِ مدحت سے قلم چلنے لگا

پھر حروفِ اِسمِ احمد سے ہوا ہے اکتساب

مدعائے دل کو پھر ملنے لگے اظہاریے

پھر مرا حرفِ تمنا ہو رہا ہے باریاب

ہو حریفِ جلوۂ حسنِ مکمل کس کو تاب

پرتوِ روئے نبی سے آئینے ہیں آب آب

تابشِ خورشیدِ محشر منہ چھپا کر رہ گئی

عاصیو سایہ فگن ہے ان کی رحمت کا سحاب

آتشِ رنج و الم گل زار مجھ پر ہو گئی

دھوپ چھاؤں بن گئی ہے ہو گیا سورج سحاب

چہرۂ انور سے اپنے وہ اٹھا تو دیں نقاب

نور کی کیا لا سکے گا دیدۂ بے تاب تاب؟

ذرہ ذرہ عالمِ امکاں کا روشن ہوگیا

مطلعِ فاراں سے ابھرا ہے یہ کیسا آفتاب

جسم و جاں میں ہے غبارِ راہِ طیبہ کی مہک

میں نہیں ہوں اب رہینِ منتِ مشک و گلاب

از مقامِ مصطفیٰ جز حق کسی آگاہ نیست

ایں قدر دانم دگر واللہ اعلم بالصواب

از خدائے پاک خواہم اجرِ نعتِ مصطفیٰ

عندہ خیرالجزاءِ عندہ حسن المآب

مجھ کو شاکرؔ آتشِ دوزخ سے اب کیا خوف ہو

ہوں غلامِ مصطفیٰ حلقہ بگوشِ بو تراب