جو تھا روز_ازل سے زینت_عرش_بریں ہو_کر

جو تھا روز ازل سے زینت عرش بریں ہو کر

وہی آیا جہاں میں رحمتہ اللعالمیں ہو کر

تمامی انبیا آئے گئے خندہ جبیں ہو کر

مگر محبوب حق آئے شفیع المذنبیں ہو کر

وہی اک نور جو چمکا تھا پیشانئ آدم میں

جہاں کو آشکارہ کر دیا نور مبیں ہو کر

کبھی آیا وحی لے کر وہ نامہ بر کی صورت میں

کبھی آیا جناب یار میں روح الامیں ہو کر

یہی اپنی متاع دین و دنیا ہے شمیمؔ انجم

رہے تا زندگی عشق محمد دل نشیں ہو کر